مجلة حروف و معاني

بقلم الشاعر

    Sabry Aly


** أحاسيس ..
                                              (1)
 كلمة ودايما أقولها' للّى معاه التّمن ..
أنا قلبى رح أبيعه , والدّفع مقدّما ..
أصبح ما يلزمنيش, ولا حتّى دقّاته ..
دا شئ محشور فى صدرى, وتاعبنى من زمن .!
                                               (2)
صبح الفؤاد مشغول , والرّوح متشوّقة ..
والعين شايفة الحياة  ' عروسة, مزوّقة ..
طب ليه كل امّا اشوفك' بالقاك دايما مكشّر ..
لسّة ما آنش الأوان ..... ' إنّك تفرح بقى .?
                                              (3)
لو شارى مش هابيعك ' صدّقنى مش هاقدر ..
لو يحضنّنى ربيعك ' رح اشوف هواك أخضر ..
وانّ بعت أنا مش هالومك,ولا هاقدر ع العتاب ..
لكن أكيد هاسألك : "مين حبّ مين أكتر" .?
                                              (4)
هىّ الحياة دى إيه من غير مودّة, وحنان .?
وخلّ يشكي لخلّه' لو كان فى يوم تعبان ..
وخلّه ياخد بإيده , ويشيل معاه حزنه ..
ويقول له: "نقسم ما بينّنا الفرح, والأحزان" .

صبري على