مجلة حروف و معاني

بقلم الشاعر



      سلطان زماني


أوعاك تعيش دور الضحية
أصله مش لايق عليك
يعني هي المفترية
وأنت..
ما شاء الله عليك
ملاك ونازل م السما
زي ما تكون بجناحات
أنما باقي الحاجات
هي اللي ظالمة ومتعبة
هي اللي عاملة المشكلة
هي اللي برضه اتلككت
علشان تحل المسألة
وأنت كنت وديع برئ
كنت بتصالح وتنسي
كنت ترسم في الطريق
بس هي كات بتقسي
حابة تمشي ف المعاكس
وأنت رافض يوم تسيبها
كنت بتحاول تسايس
وهي مش شايفاك حبيبها
هي دايماا عايزة تبعد
كل مرة غاوية تعند
تبقي دايماا حيطة مايلة
لما كنت تحب تسند
وأحنا م المفروض نصدق
كل كلمة من كلامك
لأ بسرعة كمان حنبدأ
أننا نخفف ألامك
الكلام ده كله كدب
كلنا عارفين مساوئك
أنت جارح ألف قلب
ولا أجيب صفحة سوابقك
تحب أقولك الحقيقة
قبل ما تمثل علينا
هي كات دايما بريئة
وأحنا شفنا ده بعينينا
عايشة دايما مخلصالك
عاندت كل الكون عشانك
قدمتلك كل حاجة
حابة بس تشوف حنانك
وأنت يخربيت برودك
كنت أبرد م البلاط
ياما أتعديت حدودك
وهي تغرق ف العياط
طب دخلت ليه ف حياتها
أيوة فعلا اية اللي جابك
كنت أكبر أمنياتها
وهي برة دماغ جنابك
كنت دايما تنتقدها
لما تزعل من غيابك
كان بيخنقك اهتمامها
لما تبقي مع صحابك
بكرة تكره يوم وداعها
وهي تدعي ع اللي جابك